Naskah Siaran Bina Tani : Pengenalan Pestisida Nabati

JUDUL                                   : PENGENALAN PESTISIDA NABATI

BENTUK                               : DIALOG INTERAKTIF (OBROLAN)

WAKTU                                : 45 MENIT

PEMBUAT NASKAH          : WAHYUDDIN NOOR, SP/PP. WKP LABUNGANAK

TUJUAN                               : Terinfokannya pengenalan dan cara pembuatan pestisida nabati

POKOK PERBINCANGAN

1.   Pencegahan dan Pengendalian JAP dan KAS pada Tanaman Karet

No	Narator	Narasi
1	Pembukaan	Pendengar Radio Nirwana, di mana saja berada, senang sekali pada kesempatan ini kita berjumpa lagi dalam siaran bina tani yang terselenggara atas kerjasama Badan Pelaksana Penyuluhan Kabupaten Hulu Sungai Tengah dengan Radio kesayangan warga Barabai. Kali ini tema yang kita bahas adalah pengenalan pestisida nabati.  Akhir-akhir ini banyak petani yang mengeluhkan tentang mahalnya harga pestisida, selain itu manfa’at dari pestisida yang digunakan, beberapa dinilai kurang efektif untuk mengendalikan hama maupun penyakit yang menyerang tanaman padi sawah Untuk mengenal lebih jauh tentang pestisida nabati dan bagaimana cara pembuatannya, marilah kita simak bersama obrolan PPL Udin dan Haji Usuf.
2	Pak Usuf	Uii PPL Udin... Handak kamana tu ?
3	PPL	Ehh...Assalamu’alaikum Pak Usuf, napa tu diulah
4	Pak Usuf	Wa’alaikum Salam.., ulun manjanguk pahumaan banarham nah Pak ae,  pindanya mulai disarang hama.  Pian ti handak kamana Pak PLL ?
5	PPL	Ulun handak kunjungan Pak Usuf ae, kabatulan hari ini jadwal ulun ka pahumaan  buhan kalompok  Pian
6	Pak Usuf	Nah, Pas banar Pak PPL ae, ulun kabalujuran ada nang handak ditakunakan
7	PPL	Ae ayuha Pak Usuf ae,  napa ti kisah
8	Pak Usuf	Mun kawa minta tulung lihatiakan pahumaan ulun PPL lah, pindanya  tasarang wiring cuklat pang.
9	PPL	Ae tahulih sudah pian lawan wiring cuklat Pak Usuf
10	Pak Usuf	Umai Pak PPL nih, kada ingatkah pian, ulun tahun samalam umpat SL-PTT kalu, ulun ada jua mandangarakan siaran radiu bina tani nang mambahas wiring cuklat Pak PPL ae, jadi ada pang tatarang upih tahu jua tantang wiring cuklat...

No	Narator	Narasi
11	PPL	Alhamdulillah banar mun pian sudah tahu lawan wiring cuklat Pak Usuf pae.  Ulun umpat malihat pahumaan pian nang kana wiring tih lah
12	Operator	Lagu Banjar
13	Pak Usuf	Kayapa am Pak PPL pahumaan ulun, bujurlah pindanya pahumaan ulun tasarang wiring cuklat
14	PPL	Nah bujur pak ae, pahumaan pian kana wiring cuklat,nah ninih nah urangnya (sambil manunjuk ka wiring culat) imbah ulun lihati, parkiraan ulun sekitar 2 sampai 3 ikung wiring sarapunnya, mun kawa pak ae lakasi dikandaliakan
15	Pak Usuf	Uma lih Pak PPL kayapa ti cara mangandaliakannya ?
16	PPL	Cara pangandaliannya bisa haja pak ae manggunaakan ubat samprot nang ngaran sabujurnya disambat pestisida, ada pestisida nang babahan kimia ada nang babahan nabati
17	Pak Usuf	Kayapa tih Pak PPL nang disambat lawan pestisida babahan kimia lawan nang babahan nabati.
18	PPL	Jadi Pak lah, pestisida nang babahan kimia tuh nang banyak dijual urang dituku ubat samprut tuh pang Pak ae, ngarannya macam-macam ada Dharmabas, Check, Fillia, Spontan, dll.  Mun nang babahan nabati tuh Pak ae, ubat samprut nang bahannya diulah dari tumbuhan atau tanaman nang kayak daun kulanda, daun kastila, cangkih, tambakau, dll.
19	Pak Usuf	Nang mana yu Pak PPL lah, pestisida nang  tabagus gasan mangandaliakan hama atawa panyikit banih tih?
20	PPL	Sabujurnya Pak Usuf Lah, pestisida kimia itu bagus haja jua, asal panggunaannya maumpati parinsip 5 Tapat : tapat janisnya, tapat takaran/dosisnya, tapat waktunya, tapat sasarannya, lawan tapat jua caranya. Nah pestisida nang babahan nabati tu Pak ae kayaitu jua
21	Pak Usuf	Mun pestisida babahan kimia ti napa kalabihan wan kakurangannya Pak PPL ?
22	PPL	Kalabihan pestisida kimiawi tu Pak Usuf, diantaranya : bila disamprutakan lakas hasilnya kalihatan, kada cariwit maulahnya karna sudah ada dituku ubat, mambunuh hama sampai apus matinya, dll. Mun kakurangannya, antara lain : sapalih harganya larang, mun kada hati-hati ,bahaya bagi kasihatan lawan lingkungan, musuh alami hama umpat matian jua, hama bisa jadi kabal atau taguh, bisa maulah sarangan hama babangat, lawan jua bahan kimianya bisa manumpuk ka banih nang di katam, mun kimianya kabanyakan bisa maulah banih baracun.
23	Pak Usuf	Ooo kaya itu lah Pak PPL, mun pesstisida nabati pang kayapa kaunggulannya ?
24	PPL	Nah mun kaunggulan pestisida nabati tih Pak Usuf ae, pertama bahannya nyaman dicari, mun manukar murah haja, kadua nyaman maulahnya, ketiga pestisida nabati kada tapi berbahaya lawan kasihatan dan lingkungan sakitar, salanjutnya pestisida nabati tih Pak Ae kada maulah taguh ka hama lawan kada mamatii ka musuh alami nang mamakani hama, contoh musuh alami tih nang kaya kodok, siuragung, pikurat, kabibitak, dll.
No	Narator	Narasi
		Nang bagusnya lagi Pak Usuf ae, banih nang disamprut lawan pestisida nabati haja, insya Allah sihat karna kada mangandung zat kimia nang babahaya gasan kasihatan
25	Pak Usuf	Nah baik banar tu baarti Pak PPL ae, parlu banar ni dicubai.  Tapi Pak PPL adalah jua kakurangannya Pestisida nabati ti ?
26	PPL	Mun kakurangannya ti ada haja jua Pak ae, misalnya lambat bariaksi maampihakan, kada mambunuh hama sacara langsung, mun kana sinar matahari bisa kada bafungsi,  Jua kada kawa disimpan lawas lawan harus dirarancaki manyamprut
27	Pak Usuf	Nah uma lih, han mun ulun kada batakun ti kada tahu ulun kakurangan dan kalibihan pestisida nabati. Ni ulun umpat batakun pulang pak PPL lah ?
28	PPL	Ae, kadapapa Pak Usuf ae, ulun katuju banar pian batakun, Cuma mun ulun dapat haja manjawab ulun padahakan, mun kada kawa kena ulun takunakan lawan nang tatahu..
29	Pak Usuf	Anu Pak PPL ae, kayapa apa garang lih pestisida nabati ti, napa jar urang cara kerjanyakah ?
30	PPL	Pestisida nabati ti Pak Usuf ae cara karjanya inya bisa marusak ka hintalu hama, tamasuk nang sudah manjadi hulat, selain itu mancagah hama baganti kulit, maulah hama kada baliur makan, maulah hama mandul jadi kada sinanakan.. Imbah hitu Pak lah, maulah kamampuan sarangga makan tahambat. Jua sifat pestisida nabati ti mangusir hama terutama serangga. Sadangkan untuk panyakit, pestisida nabati bisa mahambat bibit panyakit.
31	Pak Usuf	Ooo kaya itu PPL lah . Asa handak banar nah ulun mancubai mamakai pestisida nabati ti, Cuma ulun kada bisa baulahnya. Kaya apa garang ti cara baulahnya Pak PPL ?
32	PPL	Syukur banar mun pian handak mancubanya Pak Usuf ae.  Cara baulah pestisida nabati nyaman haja.  Misalnya cara baulah pestisida nabati gasan managandalikan wiring cuklat..
32	Pak Usuf	Kaya apa ti Pak caranya, ni Panting banar gasan ulun Pak ae..
33	PPL	Pian bisa manggunakan daun kulanda
34	Pak Usuf	Ae, nyaman haja tu Pak PPL ae mancarinya
35	PPL	Inggih Pak ae, di pahuman pian ada haja kalo batanam kulanda
36	Pak Usuf	Ada banar Pak PPL ae, ada pang saku ampat lima puhun
37	PPL	Syukuran tu mun pian baiisian puhun kulanda.
38	Pak usuf	Inggih Pak ae, ada pang saku sabiji dua nang masak
39	PPL	Ae, bujur kah Pak Usuf, kawa haja saku ulun umpat marasai kulandanya tu
40	Pak Usuf	Gampang haja Pak ae, kena ulun mamutikan..
41	PPL	Kada Pak usuf ae, ulun bagaya haja...
42	Pak Usuf	Kada papa Pak ae, tampulu masak nyaman jua pian marasai..

No	Narator	Narasi
43	PPL	Nah, cara maulah pestisida nabati dari daun kulanda tih Pak  Usuf ae sutil haja. Bahannya Pak ae, daun kulanda saganggam, imbah hitu bungkah jariangau saganggam, bawang putih 20 himpil, sabun culit dua sinduk, banyu sa 20 litar atau sa wadah samprutan solo labih sadikit.
44	Pak Usuf	Ooo gampang haja tuh Pak PPL ae, nyaman haja bahannya dicari
45	PPL	Cara maulahnya Pak ae, daun kulanda, bungkah jariangau, bawang putih ditumbuk, campur lawan sabun lalu di randam dalam banyu 20 litar salama dua hari. Imbah hitu randaman tadi disaring di ulah salitar-salitar, ramuan tadi kawa di campur lawan banyu 10-15 litar, nah satalah itu kawa haja langsung di samprutakan ka banih
46	Pak Usuf	Ooo sutil haja Pak ae, cuma ulun ti asa takutan salah mun manggawi saurang, kaena tulungai kawani ulun baulah Pak PPL lah
47	PPL	Ae, ayu banar ulun akur haja. Kayapa mun bawai kakawanan pian nang lain Pak, kita baimbaian maulahnya, sakaligus mambuktiakan pestisida nabati ti
48	Pak Usuf	Nah akur banar Pak, kaina ulun bahabar lawan kakawanan, salajur kami manyiapakan bahannya, pian siap haja kalo Pak mandampingi kaina
49	PPL	Inggih ulun akur banar Pak Usuf ae, kena habari ja ulun Pak usuf lah. .Karna sudah siang ulun handak permisi Pak ae, ulun handak mangunjungi kalumpuk lain pulang
50	Pak Usuf	Ulun tarima kasih banyak Pak lah dibarii panjalasan
51	PPL	Sama-sama Pak lah, ulun parmisi dulu Pak ae.  Assalamu’alaikum........
52	Pak Usuf	Wa’alaikum salam Pak PPL, barilaan Pak PPL lah
53	Penutup	Bapak ibu warga tani, pendengar radio nirwana di mana saja berada, demikian tadi obrolan Pak Usuf dan Pak PPL, semoga bermanfa’at dan sampai jumpa lagi dengan siaran bina tani episode selanjutnya dengan topik yang lain.  Terima kasih. Wassalamu’alaikum Warahmatullahi Wabarakatu

Sumber :

1.        www. http://dinpertan.grobogan.go.id/laboratorium/144-pengendalian-hama-dan-penyakit-dengan-pestisida-nabati.

1.       www.e-petani.com/PESTISIDA NABATI/efri.barabai.hst

Ilung, 27 Februari 2014

Pembuat Naskah Siaran Bina Tani (SBT)

WAHYUDDIN NOOR, SP

NIP.  19821208 201001 1008

* Mohon dengan kesadarannya bila memanfa'atkan atau mengutip tulisan ini bisa mencantumkan alamat blog saya sebagai sumber resminya